17ê Tîrmeh 2010/11:28

Yekîtiya Zarok û Ciwanên Kurdistan-KOMCIWAN, li Elmanya, bajarê Wuppertalê buroya xwe ya navendî vekir.

Dengê Azad/Wuppertall

KOMCIWAN ji bo kar û xebatên xwe projeyek du salîn amade kiriye û ji Daîra Federal ya ji bo Koçber û Penaberan alîkarî û pişgirî girtiye. Buro jî di çarçûva vê projeyê de wek navenda têkilî û xebatê karê xwe dimeşîne.

Ji bo danasîn û vekirina buroyê, ji aliyê KOMCIWANê ve resepsiyonek hat amade kirin. Ji bo resepsiyona ku di 16.07.2010´an de hat li dar xistin, rêxistin û kesên Elman yên bi kar û xebatên ciwanan mijûl in hatin vexwendin.

Şaredara bajarê Wuppertalê Sitî Schultz, Berpirsê Beşa Civakî, Entegrasyon û Ciwanî ya bajarê Wuppertalê Dr. Stefan Kuehn, Berpirsê Beşa Koçber û Entegrasyonê ya bajarê Wuppertalê Sitî Christine Roddewig-Oudnia, Berpirsa Platforma Ciwanan ya Eyaleta NRW Sitî Britta Duckwitz, Berpirsê Saziya Ciwanan ji bo Ewrupa, ku kar û xebatên xwe di bin siya Yekîtiya Ewrûpa-YE de didomîne, Christof Kriege, Berpirsa Navenda Pisporî ya Kar û Xebatên Ciwanan ya Navnetewî a Elmanya Federal Sitî Claudia Mierzowski, Berpirsê Platforma Ciwanan ya Bajarê Wuppertalê Eisenblaetter, ji Rêxistina Ciwanên Elman li Ewrûpa beşa NRW Sitî Susanne Koch û Serokê KOMKAR.eu Kovan Amedî beşdarî resepsiyonê bûn.

Resepsiyon bi axaftina Seroka KOMCIWAN û Rêxistina Ciwanên Elman li Ewrûpa-djo, Hetaw Tek despê kir. Tek, xêrhatin li mêvanan kir û ji bo hatin, alîkarî û pişgiriya wan spasdariya xwe pêşkêş kir.

Piştî Hetaw Tek, Şaredar Sitî Schultz axaft. Sitî Schultz jî ji bo vexwendinê spasî KOMCIWANê kir û ji bo ku navenda KOMCIWANê li Wuppertalê ye kêfxweşiya xwe eşkere kir. Sitî Schultz weha got: „Em baş dizanin, ku Kurd fermî wek gel nehatine qebûl kirin û ji ber vê yekê jî kar û xebatên KOMCIWANê giring dinirxînim.“ Sitî Schultz pît kir, ku hevkarî, alîkarî û pişgiriya wan wê her dem berdewam bike.