25ê Tîrmeh 2010/18:03
Di civîna civata wezîran de biryar hate dayîn ku erka parastina safgehên petrolê yên Herêma Kurdistanê radestî polîs û hêzên hikûmeta Herêma Kurdistanê bê kirin.
Dengê Azad/Hewlêr
Civata Wezîran a hikûmeta Herêma Kurdistanê di duyemîn civîna xwe de çend biryarên taybet bi hinartina petrola Herêma Kurdistanê bo derve ragihand û li gor wê biryara civata wezîran ji vir û pê de parastina safgehên petrolê yên Herêma Kurdistanê dê di destê polîs û hêzên hikûmeta Herêma Kurdistanê be.
Sekreteê civata Wezîran a hikûmeta Herêma Kurdistanê Mihemed Qeredaxî di daxuyaniyekê de ragihand ku ji bo rêgirtina her binpêkirinek ji vir û pê de parastina safgehên petrolê dê ji aliyê hikûmeta Herêma Kurdistanê ve be û ew erk jî dê ji aliyê hêzên polîs û hikûmetê ve bê bicihanîn.
Heta niha parastina safgehên petrolê yên Herêma Kurdistanê di destê hêzên taybet de bû.
Derheqê hinartina petrolê de jî Qeredaxî wiha got: “Ji vir û pê de hinartina petrolê bi hesab dibe û petrola xam jî bi tu awayekî bo derve nayê hinartin. Divê petrola xam bi rêya rizamendiya darayî û rêketin digel hikûmeta navendî bi rêya boriyê petrolê yên ku diçin Tirkiyeyê petrol bo derve bê hinardekirin.”